Denegkan: کورته‌ چیرۆکی پاییزێک .... به‌ندی عه‌لی

کورته‌ چیرۆکی پاییزێک .... به‌ندی عه‌لی
================================================================================
bandiAli on 2010-01-16
 
.. سیپتێمبه‌ری 2009
هه‌تاو ، گڵۆپێکی زه‌رده‌
به‌ڕایه‌ڵی ئاسمانه‌وه‌
با ، گۆرانیه‌ خه‌مباره‌کان ده‌ڵێته‌وه‌
دره‌ختێکی مات و مه‌لوول
ژێرکراسی گه‌ڵای داکه‌ند
نه‌رمه‌بارانی هه‌لپه‌رست
دڵۆپ دڵۆپ
وه‌ک هه‌وه‌سبازێکی سادی
بست به‌بستی گیانی ماچ کرد
ئه‌ویش هه‌ڵکوڕما ، له‌شه‌رماو
هه‌موو زستان
له‌ژێر لێفه‌ی نه‌رمی به‌فرا
خه‌وی لێکه‌وت
تاکو دیسان به‌هار هات و
وه‌ک شۆڕه‌سوارێکی ئازای
چیرۆکه‌ ئه‌فسانه‌ییه‌کان
کراسێکی سه‌وزی تری کرده‌به‌ری و
به‌ماچێکی پڕ ئه‌وین له‌خه‌وی هه‌ڵسان