باڵندە سەمەرەكان ...... رێبین ئەحمەد خدر

2008-09-18

  
 باڵندە سەمەرەكان   ...... رێبین ئەحمەد خدر
 
چەند شیعرێكى كورت    
 
                بووكە بە بارانە
               كاتىَ زانیم
                    تۆ بە باران دڵت تەنگ دەبىَ ،
                    لە هەموو ئەو بووكە بە بارانانە پەشیمان بوومەوە
                    كە بە منداڵى بەشداریم كردبوون.
                               
                                  پشیلە
 
               وەك چۆن (گریكۆر سامسا) ى "كافكا"
                     دەبێتە قالۆنچە ،
                     حەزدەكەم
                     بەیانییەك كاتىَ لە خەو هەڵدەستم
                     بووبم بە پشیلە
                     لە نێو بۆ و بەرامەى چێشتەكەت
                     لە نێو موبەقەكەى
                     ماڵى ئێوەدا..
                            
                     
 
                          ئاوابوون  
       
                     لە ئێوارەیەك دا
                     سەیرى پەڵە هەورەكان دەكەیت و
                     گۆرانى دەڵێى ،
                     تەرمى من دەبینى
                     باڵندەیەكى بچووك
                     دەنووكى لە نێو قژمداو
                     هەڵى گرتووم ،
                     شەمشەمە كوێرەیەك بە دوایدا
                     كتێبێكى هەڵگرتووە
                باڵندەیەكى تر
                     قەفەسێكى پىَ یە
                     زۆر بڵند دەفڕىَ
                     لە نێو قەفەسەكەدا نامەیەكى تۆ.
           
                                                                                                                                          
                          نزیكتر لێرە
 
                نزیكتر ، نزیكتر لێرە
                   دەنگى گریانىَ دىَ..
                   لە خۆمەوە وا هەستدەكەم دەنگى كچێك بىَ .
                   كە نزیك دەبمەوە دەزانم :
                   گریانى گوڵدانێكە
                   ئاخر دەترسىَ گوڵەكانى
                   بەرەو باخچە بڕۆنەوە . 
                                                      
                       ئاویلكە    
                                                                         
               ژنێكى جوان لە سەرە مەرگدا
                   تەشتێكى سێوى بە دەستەوە گرتووەو
                   هەڵدەلەرزىَ و دەگریىَ و دەڵىَ
                   ئەوە دەبەمەوە لاى خوا
                   بەسە با چیتر ئەوانەى دواى من
                   قەرزارى خوا نەبن…بەسە..
                   من ئەو قەرزەى
                   دایكم ( حەوا ) دەدەمەوە…!
 
 .                           سێوێك
 
               سێوێكى سوورى لا ڕزیو
                    لە ناو ناخى زبڵدانێكدا :
                    ( زبڵدان بیرى لە هەموومان فراوانترەو
                    بەردەوامیش لە گۆڕاندایە).
 
                          دەستەبچكۆلەكان  
 
                   تەپۆلكەیەك دەكەوێتە بەردەم قوتابخانەكە
                   وەك ئەوەى سەوزایى بەئاستەم
                   سەرى بەرزكردبێتەوە ،
                   ئێرە  شوێنى ڕاوكردنى  پەپوولە
                   باڵ گەورەكانە
                   سەردەمێكیش  سەكۆى شانۆى "هاملێت" ،
                   دڵم بۆتە باگوردانى ترس گێڕان
                   دەڕوانمە جوڵەى پاسەكان
                   ئۆوه...بیرم چوو
                   ڕۆژێك  هەر لێرەدا
                    لە سەر ئەم تەپۆلكەیە
                   "گۆدۆ"م بینى  لە چاوەڕوانى هاتنى كەسێكدا
                    شێت بوو بوو .    
 
 

زیادیبکه له: del.icio.us | Digg