ئاوێنەكانی برینی (ڕەهەند) ...ڕابەر فاریق

2008-09-14

 ئاوێنەكانی برینی (ڕەهەند) 
  ڕابەر فاریق
 
 بۆ (ڕەهەند) ى كوڕم، كە هێشتا لە سكى دایكییەتى، شنەیەك ڕوو لە ژیان: دۆزەخ.
 
 1
 ڕۆژێك دادێ:
 ئەم وشەیە برینم ختووكە دەدا
 لەژێر سێبەری داڵغەی خۆی ڕۆدەنیشێ
 پیتەكانی دەبن بە (با)
 پشتیان دەنێن بەم عەموودەی نیگەرانیی:
 (ڕابەر). 
 
 2
 بە كەشتیی كات و
 شەمەندەفەری هەوا و 
 گالیسكەى وشە دێم بۆ ژیان
 بە بەلەمی كاغەزی و
 ئۆتۆمبێلی وێنەیی و
 پاسكیلی خەیاڵیی دەڕۆم بۆ مردن:
 -منیش دەڕۆم
 بەرەو میانی هەردووكیان.
 
 
 
 
 
 
 3
 بە هەردوو دەست سڵاو لە كەسێك دەكەم
 دەچمە بابل.. بە خەتى بزماریی نا
 بە خەتی وشە،
 نامەیەك بۆ كورد دەنووسم
 بە فارسیی.
 
 4
 (لە زەویدا كوانێ مرۆڤ؟)
 ئەمانە ئەو سێ وشانە بوون
 لە دەفتەری خۆكوژێكدا دۆزیمنەوە:
 بە سڕدراویی.
 
 5
 لەگەڵ هەموو نەیارانم
 بە وشە ئاشت بوومەتەوە
 نەك بە دەست گوشین و بە ماچ.
 
 6
 (دڵی خۆم دەدەمەوە:)
 (بە قسەی خۆش)
 (بە یار)
 (بە خۆم).
 - ئاه، ئەم (دڵ) ە بوو بە چى؟
 
 
 
 7
 زەوییش چووەتە سەفەر:
 بە خۆی و وەچەكانییەوە.
 
 8
 تەنك بوومەتەوە: چوون كاغەزی بەر لێزمەى وشە
 تاریك دادێم: چوون ژووری بىَ كتێب. 
 من لە وەچەى خۆڵم، نەك ئینسان.
 لە وشەمدا پیاوێك دەحەسێتەوە، نەك بێزاریم.
 تێكدەشكێم چوون شكست.
 هێندە نیگەرانم، چ ئازارێك نامگرێتە خۆی.
 ئێوارەیەك،
 دەگەڕێمەوە نێو لیسەكەم، وشەیەك دەگمێنێ:
 خۆكوشتن.
 دێمە بەردەم هەوا، شەقامێك دەنووشتێتەوە.
 دەچمە كۆڵانى سێبەر،
 جۆگە لەبەردەم زمانمدا لەنگەر دەگرێ.
 چ سیگارێكم لەكن نەماوە،
 بە تلیاكى وشە خۆم لەبیر (بوون) دەبەمەوە.
 بیردەكەمەوە:
 بانیژە نایەتە خوارەوە و
 پیاوێك دەڵێ: لە تەنیاییش تەنها نابم.
 
 
 
 
 
 9
 ئەگەر بە سوێدیش بنووسم
 كەسێك شك دەبەم لەلای ڕاست:
 بە لای چەپیش، بە كامى خۆی لێم تێبگا.
 
 10
 نامەیەكم بۆ بنووسە
 بەو وشانەی نەگوتراون
 بەو وشانەی نەچوونەتە نێو ڕستەوە
 چوون تۆ نەهاتوویتە نێو من
 نێو زیندانی وەهمێكەوە.
 
 هەولێر- 2008
  
 
 
 

زیادیبکه له: del.icio.us | Digg