بۆ ئاگاداری ... سه‌لام محه‌مه‌د

2008-09-10

بۆ ئاگاداری ... سه‌لام محه‌مه‌د
  
 
 شاعیرێکی هاوڕێم
 وشه‌کانی،
 بۆنی بارووت و خۆڵی پاش باران و
 هاوار و زریکه‌ی مناڵ و رۆژه‌ زه‌رده‌کانی ئه‌نفال و
 هه‌ڵه‌بجه‌یان لێدێت
 
 شاعیرێکی هاوڕێم
 شیعره‌کانی،
 بۆنی ئاره‌قه‌ی له‌شی ژن و مه‌مکی ژن و عه‌تری ژن و
 چرپه‌ی نه‌رم و گه‌رمی ژنیان لێدێت
 
 
 ئه‌و شیعرانه‌ی که‌ منیش ساڵه‌هایه‌که‌ نایانووسمه‌وه‌و
 هه‌موو ژوور و سه‌ردابه‌کانی نوگره‌ سه‌لمانی دڵمیان پڕ کردۆته‌وه‌..
  ته‌نیا هه‌ر بۆنی که‌رکووکیان لێدێت
 بۆنی نه‌وته‌که‌ی که‌یوان و خانووه‌ کۆنه‌کانی حه‌سیره‌که‌و
 مزگه‌وته‌که‌ی ره‌حیماوه‌و
 ئاواره‌کانی فه‌یله‌ق و
 بۆنی میمی ئامین و میمی فه‌خریان لێدێت
 بۆنی چایخانه‌که‌ی شۆریجه‌و بازاڕی مێوه‌که‌ی ئازادیان لێدێت..
 
 ئه‌گه‌ر تۆزقاڵێ غافڵ بم و په‌نجه‌ره‌یه‌کی ناخم بکرێته‌وه‌
 باڵنده‌ شیعرێك فرسه‌ت ئه‌هێنێ و
 ئه‌دا له‌ شه‌قه‌ی باڵ و فیرار ئه‌کات
 تکایه‌ ئه‌گه‌ر له‌ هه‌ر شوێنێکدا
 باڵنده‌یه‌کی ئاگراویتان بینی.... لێی مه‌ترسێن
 ئه‌وه‌ شیعرێکی هه‌ڵاتووی ناخی منه‌.
 
 سوید- 09 / 09 / 2008
 
 

زیادیبکه له: del.icio.us | Digg