لێبوونەوە....كارزان لێبووردە

2008-10-04

 لێبوونەوە
 "پێشكەشە بە (تۆ) كە پێویستتری لە ژیانم"
 
 كارزان لێبووردە
 
 1
 كە جارێك بە دەوری ژنێكدا خولامەوە
 پیاوبوونم
             لەلا
                     عەیب
                               بوو!
 2
 خودایە!
 بۆ چركەیەكیش بێ
 بهێڵە بەبێ (مردن)
              ژیان
      بكەم
 تا ئەو ئەندازەیەی
 مردووەكانیش بە زیندوو 
                                  حسێب
                                             بكەم!
 3
 كە مرۆڤـ دەخنكێ:
 ئای ئاو... چەند
                  د
                       ڵـ
                  ڕ
                       ە
                 قـ
                      ی!
 4
 گوڵ...،
 باخ گوتوویەتی
 منیش...،
 تۆ!
 5
 ژن: ماست
 پیاو: ئاو
 فێنكایی هاوین،
 لە جامێك ماستاو دایە!
 6
 دەبێ چۆن بم
 كە خودا بەزەییی پێمدا بێتەوە؟ 
 دەبێ چۆن بم
 كە وەكوو تۆ
 ژیان و
  جوانی و
 منداڵییی... لێم نەبنەوە؟ 
 دەبێ چۆن بم
 كە سێو بۆ خۆی بۆم بەربێتەوە
 كە بەیانییان لە دڵی هەموو كیژێكدا
                                            ڕۆژ
                                                   بكەمەوە؟
 7
 نانەوایەك گوتی:
 گەر خوا جەستەی هەبوایە
 ئەوا هەموو نانەكانم
 لە شێوەی ئەودا دروست دەكرد.
 

زیادیبکه له: del.icio.us | Digg