بانگه‌واز بۆ وه‌ستانه‌وه‌ دژ به‌ سه‌رکوت و تیرۆر

  
 ململانێی ئازدیخوازان و ده‌سه‌ڵات و پاوانکه‌رانی کۆمه‌ڵگه‌ شتێك نییه‌، تازه‌ بێ و تایبه‌ت بێت به‌ سه‌رده‌مێك، کۆمه‌ڵگه‌یه‌ك یا گۆشه‌یه‌کی جیهان، به‌ڵکو ئه‌وه‌ی ئه‌وڕۆکه‌ له‌ کوردستان ملمانێی پێنووس و چه‌ك ده‌گاته‌ ئاسێك که‌ ناچار بین، خوێنی خۆمان بکه‌ینه‌ کاسه‌یه‌ك و مێژووی ئه‌م ملمانێیه‌ی پێ بنووسینه‌وه‌، درێژه‌ی هه‌مان ڕه‌وتی مێژووییه‌، که‌ له‌سه‌رتاسه‌ی جیهاندا به‌نرخی گیانبه‌خشی سه‌دان و هه‌زاران به‌ڕێژه‌یه‌ك لێره‌و له‌وێ ئازادییه‌ تاکه‌که‌سی و گشتییه‌کانی به‌سه‌ر سه‌روه‌راندا سه‌پاندووه‌.
 
 تیرۆری ڕامیاری یا به‌ دیوه‌که‌ی تریدا تیرۆری ده‌وڵه‌تی، کۆڵه‌که‌یه‌کی کۆنی ده‌سه‌لاته‌ و له ‌به‌رامبه‌ریشیدا یه‌کگرتن و یه‌کڕیزی ئازادیخوازان له‌ سه‌نگه‌ری زۆرلیكراواندا ته‌نیا چه‌کێکه‌، که‌ ده‌کرێت له‌ کۆتاییهێنان به‌ پاوانگه‌ری پارته‌ رامیارییه‌کاندا هانای بۆ به‌رین.
 
 ئه‌گه‌ر دوێنێ نۆره‌ی «سه‌لاح هه‌ورامى ، ره‌ئوف كامل ، ئه‌بوبه‌کر عه‌لی ، فه‌رهاد فه‌ره‌ج و «شاپور عه‌بدولقادر» و «قابیل عادل»و .... و ئه‌مڕۆ نۆره‌ی «سۆران مامه‌ حه‌مه‌»یه‌، ئه‌وا به‌یانی نۆره‌ی من و تۆیه‌. بۆیه‌ ناکرێت و بێسووده‌ ته‌نیا به‌ ڕشتنی دوو فرمێسك و ده‌ربڕنی هاوده‌ردی بچینه‌ پای كیشمه كیشیكه‌وه که‌ ده‌سه‌ڵات و نۆکه‌رانی به‌رامبه‌ر په‌یڤه‌ ئازاده‌کان به‌ڕێیان خستووه‌. ئه‌گه‌ر تۆش به‌ ته‌مای کۆڵ نه‌ده‌ی و به‌ ئاسانیش بۆ نه‌هه‌نگه‌کانی ده‌سه‌ڵات قوت نه‌درێیت، ده‌وه‌ره‌ ده‌ره‌وه‌ و به‌ڕیزی ئه‌وانه‌ په‌یوه‌ست به‌، که‌ له‌ هیچ سه‌رده‌م و له‌ هیچ گۆشه‌یه‌کی دونیادا ملکه‌چی ده‌سه‌لات و چه‌وسێنه‌ران نه‌بوون؛ ڕیزی ئازادیخوازانێك که‌ هه‌ڕه‌شه‌ و گوڕه‌شه‌ی تیرۆرستان نه‌ك ناتوانێت چۆکیان پێ دابدات، به‌ڵکو له‌سه‌ر خه‌باتکردن له‌پیناو ئازادی سوورتریان ده‌کا و به‌رچاویان ڕوونتر ده‌کاته‌وه‌.
 
 ئه‌وه‌ی که‌ پێویسته‌ هه‌موومان ئاوڕی لێ بده‌ینه‌وه‌ و پرسیارمان لا دروست بکات، ساتی ئه‌نجامدانی تیرۆره‌کانه‌. تیرۆری ڕۆژنامه‌نووسان و ئه‌کادیمیستان له‌ کاتێکدا ده‌ست پێده‌کات، که‌ هه‌ر دوو پارته‌ ده‌سه‌لاتداره‌که‌ی هه‌رێمی کوردستان، به‌ ڕێکه‌وتنی ستراتیژی  ده‌گه‌ن و هه‌روه‌ها له‌ کاتێدا «سۆران مامه‌ حه‌مه‌» وه‌ك ڕۆژنامه‌نووسێکی چالاك و ده‌رکه‌وته‌ی که‌رکووك و «عه‌بدولستار تاهیر شه‌ریف» وه‌ك که‌سێکی ئه‌کادیمیست و ئاگا له‌ پرسی ئه‌و شاره‌ تیرۆر ده‌کرێن، که‌ ده‌سه‌ڵاتدارانی کوردستان ده‌ستیان له‌ پرسی که‌رکووك دا، که‌ زیاتر له‌ شه‌ست ساڵه‌ به‌ ڕواڵه‌ت، خه‌ڵکی ئازادیخواز و بنده ستى  له‌ پێناودا به‌ کوشت ده‌ده‌ن، ده‌رده‌که‌وێت! ئایا ئه‌مانه‌ گشتی ڕێکه‌وتن؟
 
 ئێمه‌ وه‌ك هاوکاران (ڕۆژنامه‌نووسان) و تاکه‌ ئازادیخوازه‌کانی کوردستان، داوای دادگه‌ییکردنی ئه‌و پارت و ده‌سه‌لاته‌ین، که‌ له‌ پشت ئه‌م تیرۆره‌وه‌ وه‌ستاون و بانگه‌وازی هه‌موولایه‌ك بۆ وه‌ستانه‌وه‌ و سه‌نگه‌رگرتن و یه‌کڕیزی له‌به‌ره‌ی بنده‌ستاندا ده‌که‌ین، چونکه‌ سه‌رکه‌وتن و کۆتاییهێنان به‌ سه‌رکوت و تیرۆر و چه‌وسانه‌وه‌، ته‌نیا له‌ گره‌وی هاتنه‌ پیشه‌وه‌ى خه‌باتێکی مه‌یدانی و گشتگیری ئازادیخوازان و به‌شمه‌ینه‌تانى کۆمه‌ڵگه‌دا ده‌بینینه‌وه‌ و دواجار سه‌رکه‌وتن بۆ به‌ره‌ی گه‌ل و ڕسوایی بۆ سه‌رکوتگه‌ران و پاوانگه‌رانی نان و ئازادى کۆمه‌ڵگه‌یه‌‌.
 
 سڵاو له‌ گیانبه‌خشی ڕۆژنامه‌نووس «سۆران مامه‌ حه‌مه»‌
 مه‌رگ و ڕسوایی بۆ بکوژانی ده‌نگه‌ ئازاده‌کان
 
 بۆ به‌شداریکردن له‌ واژۆنامه‌که‌دا کلیکی ئه‌م لینکه‌‌ بکه‌ن:
 http://www.petitiononline.com/Soranmem/petition.html
 بۆ په‌یوه‌ندی گرتن:             tori_zaniari_azad@yahoo.com
 
 
 
 Bangewaz bo westanewe dij be serkut û tîror
 
  milmilanêy azdîxiwazan û desellat û pawankeranî komellge ştêk nîye, taze bêt û taybet bêt be serdemêk, komellgeyek ya goşeyekî cîhan, bellku ewey ewrro ke le kurdistan milmanêy pênûs û çek degate asêk ke naçar bîn, xiwênî xoman bikeyne kaseyek û mêjûy em milmanêyey pê binûsînewe, dirêjey heman rewtî mêjûyye, ke le sertasey cîhanda be nirxî gyanbexişî sedan û hezaran, berrêjeyek lêrew lewê azadîye takekesî û giştîyekanî beser serweranda sepanduwe.
 
  tîrorî ramyarî ya be dîwekey tirîda tîrorî dewlletî, kollekeyekî konî desolate w le beramberîşîda yekgirtin û yekirrîzî azadîxiwazan lesengerî zorlîkirawanda tenya çekêke, ke dekirêt le kotayîhênan be pawangerî parte ramyarîyekanda hanay bo berîn.
 
  eger diwênê norey «Selahh Hewram» , « Rewf Kamil» , « Ebubekir 'Elî» , «Ferhad Ferec» û « Şapur 'Ebdulqadir » û « Qabîl 'Adil » û ...... û emrro norey Soran mame Hhemeye, ewa beyanî norey min û toye. Boye nakirêt û bêsûde tenya be rrştnî dû firmêsik û derbirrnî hawderdî biçîne pay kîşme kîşîkewe ke desellat û nokeranî beramber peyve azadekan berrêyan xistuwe. Eger toş betemay koll nedey û be asanîş bo nehengekanî desellat qut nedirêyt, dewere derewe û be rrîzî ewane peywest be, ke le hîç serdem û le hîç goşeyekî dunyada milkeçî deselat û çewsêneran nebûn; rîzî azadîxiwazanêk ke herreşe û gurreşey tîrorstan nek natwanêt çokyan pê dabdat, bellku leser xebatkirdin le pînaw azadî sûrtiryan deka û berçawyan rûntir dekatewe.
 
  ewey ke pêwîste hemûman awrrî lê bideynewe û pirsyarman la dirust bikat, satî encamdanî tîrorekane. Tîrorî rojnamenûsan û ekadîmîstan le katêkda dest pêdekat, ke her dû parte deselatdarekey herêmî kurdistan, be rrêkewtnî stratîjî degen û herweha le katêda «Soran mameHheme» wek rojnamenûsêkî çalak û derkewtey kerkûk û «'Ebdulstar Tahîr Şerîf» wek kesêkî ekadîmîst û aga le pirsî ew şare tîror dekirên, ke desellatdaranî kurdistan destyan le pirsî kerkûk da, ke zyatir le şest sale be rrwallet, xellkî azadîxiwaz û bindest le pênawda be kuşt deden, derdekewêt! Aya emanegiştî rêkewtin?
 
  Ême wek hawkaran (Rrojnamenûsan) û take azadîxiwazekanî kurdistan, daway dadgeyykirdinî ew parit û deselateyn, ke lepişt em tîrorewe westawn û bangewazî hemûlayek bo westanewe û sengergirtin û yekirrîzî le berey bindestanda dekeyn, çunke serkewtin û kotayîhênan be serkut û tîror û çewsanewe, tenya le girewî hatnepîşewey xebatêkî meydanî û giştigîrî azadîxiwazan û beşmeynetanî komellgeda debînînewe û diwacar serkewtin bo berey gel û riswayî bo serkutgeran û pawangeranî nan û azadî komellgeye.
 
  sillaw le gyanbexişî rojnamenûs Soran Mame Hhemh
  Merig û riswayî bo bikujanî dengeazadekan
 
 Bo beşdarîkirdin lewajonamekeda kilîkî em lînke biken:
 http://www.petitiononline.com/Soranmem/petition.html
 
  bo peywendî girtin: tori_zaniari_azad@yahoo.com